Dr Zeedel vom Myggi:

Sujet: Hämmer aigetlig alli e Vogel?

 

Spinne dien si uff dr ganze Wält

Und das nit numme wägem liebe Gäld.

E Mängge het im Hirni obe

E Vogel wo duet umme tobe

(S gilt als schygg und mega in

Hesch wenigschtens so ain drin!)

Hän Sii do drvo emänd zwai?

Denn geen Si gschiiter wider hai.

Vo däne gits nämli scho e Huffe,

Wo dr Verschtand grad duet verpuffe,

Kuum schalte si dä vermaintlig y.

 

Wie gsehts numme scho im Roothuus dry:

(Bigoscht die scheenscht Woliere vo dr Stadt)

Root, Grien, Gääl häns zämme glatt;

Hipfe vo ainer Partei zer andere,

Verduuble Zyt mit Schriibtischwandere!

 

Dierschitzer hän  bsunderi Veegel.

Do styygt bi miir im Nu dr Peegel.

Dy  Voogel sotsch pflääge wie dy Goof,

Muesch em Liedli singe bis in Schloof.

Schliesslig gälte d Rächt fyr alli glyych:

Dr Babbegai wird durchs Erbe ryych!

Am Aend tailsch mit dim Hund sy Hysli,

Dr Kääs isch numme no fyr d Mysli.

Do gits numme ains, i zell uff drey:

Dä Vogel isch zem Abschuss frey!

 

S’git uff dr Wält verruggti Sache:

Wääse zwische Monschter und Drache,

Wäder Gockel no Gaier, s wird der glunge!

Kai Hirni drfyr zwai spitzi Zunge,

Ka nit pfyffe – jetz isch es klaar

Us dr Wieschti brielts: Muammmaaaaar.

Das hämmer jetz wägem Gaddhafi:

Glii suffemer im Schwoobeland dr Kaffi!

 

S schwarz Veegeli vo Amerikaa

Het in syner Schuel kai Geigi kaa.

Aer seet d Schwiiz im Norde oobe

Und Schwede sunscht naime verschoobe.

Sii, das wär d Leesig, jo diräggt famoos,

Mir wäre d UBS uff ai Schlag loos.

Villicht diens d Schwede jo verstoo,

Ass me de Bängger muess d Boni loo.

Sunscht kennte si ooni dä Sääge

Iiri  Vogelschwärm jo gar nit pflääge!

 

Ums Gschlächt vo Hiener z’definiere,

muesch hytt Sprooche go studiere.

Denn numme mit dr Aendig ‚in‘

Sygs au wyyblig – duss wie dinn!

 

Dr polnisch Vampyr het Biss.

(Oder emänt numme Schiss?)

Interpol suecht en jo scho lang

jetz fraye sich d’Ziircher iiber dä Fang.

Usser in sym Chalet  sitze,

Bringt en hyt nit mee zem Schwitze.

Iim duets Alter uff dr Buggel rugge,

Drum muess au är Viagra schlugge.

Laider fäälts an Noochwugs nit;

Scho macht z‘Zyri dr glai Carli mit.

Wie bleed sin aigetlig die Giggeli?

Zaigsch Stytz, scho hesch se am Wiggeli?

D‘ Moral vo däre Gschicht isch fir d Katz:

Do het nit emool e Spatzehiirni Blatz.

 

S Theater um die heilige Dirm!

(Y kaas nimm heere, grieg grad Wirm)

Hämmer is emänt iibernoo und verhaue?

Wo solle d Storgge jetz iiri Näschter baue?

 

Jetz froog ych Sii mit mym letschte Satz:

Hän Si e Spatzehirni oder numme e Spatz?

Oder maine Sii emänt gar nyt zvermisse?

Denn het sicher grad ain iinegschisse.