Sujet 2013: Basler Aartevyylfalt

 

Binggis: In dr Schuel hämmer d’Aartevyylfalt duure gno,

               Vo sämtlige Dierli, Pflanze und e so.

Babbe:  Ych bi überzügt, s (v)yy(l)fältigscht isch dr Mensch!

               S git jo nit aine, wo de au wirglig kennsch.

Binggis: Jo gäll, s git Asiate, Afrikaner,

               Derno die vo do und Amerikaner!

Babbe:   S aint sin die Gääle, wo n is d’Wirtschaft stääle.

               Und die andere dien s Banggheimnis quääle.           

Binggis: Derno hämmer d Schwyzer unter d Luppe gno:

               Mer hän kaibe vyyl gleert und e mänggs verno.

Babbe:  Das glaub i ooni Froog, das isch kai Wunder!

               S isch e Duurenand und e huffe Plunder.

Binggis: Aber Babbe, dasch ethnischi Vyylfalt!

               E kunterbunti Multikultur halt!

Babbe:   Das fäält is no: ässe mit Stääbli oder griechisch,

               Vodka suffe statt e Kirsch und danze wie d’Derwisch.

Binggis: Mer könnte doch unhaimlig dervo profitiere,

               Unser Inträsse in iiri Brüüch z’inveschtiere.

Babbe:  Gly schwätze mer nümme dütsch, scho gar kai

               ‘Baseldytsch’:

               Derfür haissts jetz: ‘Hej Mann kuul, di Alti isch e Bitsch’.

Binggis: Ainzelni dien e weeneli störe,

               Die wänn jo numme au zue uns ghöre!

Babbe:   Druff uffe die Griene und die Roote!

               Und anderi mit dr glyyche Noote!

Binggis: Roti, Schwarzi, Gääli - machsch mi langsam mied -

              Sin die beschte Kirsi uus em Baselbiet!

Babbe:  Und wäge däm mit däne fusioniere?

               Kasch grad so guet die vo Rieche probiere.

Binggis: S’git so vyyli, wo mir uff se stolz si könne.

               Dängg numme an dr Federer mit sim Könne.

Babbe:  Oder an d’Bänd vo dr Heilsarmee, wo wott mit Glämmer

               Dr Dolgge uuswetze vom letschtjöhrige Schämmer.

Binggis: Wenn d’Fraue hüroote und iire Namme bhalte,

               Könne sich d’Aarte jo no vyyl mee entfalte.

Babbe:  Super: s’bruucht kai Hüroot no Familieplanig.

              Vo wämm d’Goofe sin, hett kain me e Aahnig!

Binggis: Babbe, handle sozial und dängg global,

               So giltsch au du als international.

Babbe:  ProSpezieRara, erhör mi, ych bätt di aa,

              Mer mien au no d Basler uff dyner Lischte ha!

 

 

 

              D Ladäärne-Uusstellig uff em Minschterplatz und

              d Waage- und Reggwisyte-Uusstellig bi dr Kasäärne

              sin vom Määntig znacht bis am Mittwuch demoorge!

              Nit verpasse: d Schääsede am Mittwuch am 5 Zobe

              am Blumerain!

 

         www.blooggaischt.ch