MADE IN CHINA

 

D‘Chaise: 

Dr Kaiser vo Kyna ka im Graab nümm schloofe,

Aer kunnt euch alli mit Verachtig go stroofe:

Will d’Billig-Lümpe, wo dir am Lyyb dient traage,

Vom Hungerduech sin, wo si Volgg dra muess gnaage!

Dr Värs:

Dr Billig-Jakob vo dr Mäss ka go:

No vyyl billiger losch‘s us Kyna ko.

D Billigloohnländer dien is verfiere,

Drum diemer alles dört hi spediere,

Ass si‘s naie oder zämmesetze.

-kasch Gaissle glöpfe und alli hetze -

Wär schäärt sich denn dörte um d‘Menscherächt?

Wär gryfft scho y bi soonig grosse Mächt?

Und öb si au no d‘ Umwält zerstöre? –

S’isch sooo wyyt ewäg, wär söll das störe?

Drno kärelet me‘s zrugg, grad in Laade.

Soone T-Schört kasch kuum zwaimool traage:

kai Abnajer, kai Säum und d‘Nööt göhn uff.

Und noonem Wäsche hesch numme e Puff.

Die Lümpe sin ryf für dr Bebby-Sagg

(Und jo nit öbbe für dr Klaidersagg!)

Kaufsch halt öbbis Neus, s’koschtet jo fascht nüt,

Dääwääg gfallt s‘Lädele de maischte Lüt.

Und s‘Spiilzüg  (ainzig billig isch wichtig)

Isch - wenn de Glügg  hesch - nit emool giftig.

Glaini Goofe dien s‘Züg zämmesetze,

Mien duur e troschtloses Läbe wetze.

Si dörfe jo nit emool spiile drmit

Und e grächte Loohn drfür gits au nit!

Verschwinde duet Schwyzergrüz und Armbruscht!

Das isch laider de maischte füdlewurscht.

Aart und Gattig kümmeret e kai Sau!

Modäärn muess es si und günschtig au!

Wär will scho an d’Firme und Lääde dängge,

An Arbetsplätz, wo mer em Oschte schängge.

Hauptsach miir sin zwääg, oohni schlächt Gwüsse.

Mer wänn alles ha und nüt vermisse.

Immer meh Loohn und weniger schaffe.

Billig muess‘s si, sunsch kasch jo nit raffe.

Mer sin jo nit blööd und Gyz isch doch gail.

Liggt öbbe do drin unser Seelehail?

Dä Schuss goht emänt no hinten uuse,

Denn d’Kyneese dien nit ewig pfuuse.

Ungstrooft könne mer nit Sklave halte:

S‘kunnt dr Daag, wo sii alles verwalte!