Was isch e pherfäggte Maa?

 

... aine mit Gäld und Macht

    oder numme fyr ai Nacht?

 

... aine, wo allewyl ‚jo‘ sait

    oder ain, wo-ne ‚Nai‘ nit vetrait?

 

... aine, wo d Schue sälber poliert

    und Eel in d Hoor yyne schmiirt?

 

... aine, wo gärn Kernli piggt

    und kai Fett uff de Hifte zwiggt?

 

... aine, wo  sich duggt und buggt

    und uff kai Fall ummemuggt?

 

... aine, wo uff e Disch haut

    oder sich gar nyt getraut?

 

... aine, wo si Buschi im Böggy umme stoosd

    oder am Fyroobe lieber no aine bloost?

 

... aine, wo alles waiss -

    solangs goot ooni Schwaiss?

 

... aine, wo ganz lieb und brav isch,

    drfyr e weeneli faad isch?

 

... aine, wo gärn emool blau macht

    und iber die wo schaffe lacht?

 

... aine, wo s Lääbe yynezieht und gniesst,

    dr Glütter drfyr schnäll dur d Finger fliesst?

 

... aine, wo stolz isch wie-ne Pfau?

    (Aer mag sich sälber schliesslig au!)

 

... aine, wo zimftig ka feschte und fyyre,

    suscht aber nyt Bruuchbars het in dr Biire?

 

... aine mit eme Doggderdiddel

    oder suscht eme wysse Kiddel?

 

... aine, wo sini Sogge sälber striggt

    und au suscht e weeneli anderscht tiggt?

 

... aine, wo lieber si Siggspägg pflägt

    und Komplimänt gnisslig yyneschläggt?

 

... aine, wo Aug und Oor het fyr di,

    aber schiilt saufräch an dir verby?

 

... aine, wo jede Batze glemmt

    und andere iir Gligg vergennt?

 

... aine, wo aagit wie-ne Wald voll Affe,

    het aber sälber e kai Luscht zem Schaffe?

 

... aine, wo schnurrlet und gärn duet schmuuse

    oder grad in d Kischte will go pfuuse?

 

... aine wie-ne stolze Schugger

    oder ganz e arme Schlugger?

 

... ain mit eme Stall voll Mischt und Hiener

    oder duets au e Sozialverdiener?

 

… aine, wo sportlig isch und guet ka schutte

    oder lieber so-ne gmietligi Pflutte?

 

… aine, wo sich zem Buschifudi-Gsicht rasiert

    oder aine wo Schlämpe in sim Bart riskiert?.

 

… aine, wo dinn isch wiene Sprysse?

    (Dä duet au suscht kai Strigg verrysse.)

 

 

… aine mit Vorbild-Fungtioon zem Aahimmle?

    (vo däne duets zwoor nit grad pfundig wimmle):

 

   

... aine wie dr Velo-Wessels

    oder lieber eppis bessers?

 

... aine wie dr Dürr(i) Baschi,

    so-ne liebe Wischi-Waschi?

 

... aine wie dr scheeni Eymaa ?

    (Dä kasch aber nit elai haa!)

 

... aine wie dr Morin-Stapi –

    (nimmsch doch nit e jede Gstaabi)?

 

... aine wie dr Christoph Brutschin?

    (Dä gits jo au numme zem Schyyn!)

 

… aine wie dr Bahnerth Mischa?

    (Dä muesch uff jeder Party ha.)

 

… aine wie das Federer-Ass?

    (Do waisch aifach, dä kas.)

 

... aine wie dr Seppli vo dr FIFA?

     (Muesch zem Schmiire aifach gnue Bulver ha!)

 

 

  

  D Ladäärne- uff em Minschterplatz und d  Waage- und  Reggwisyte-

  Uusstellig bi dr Kasäärne sin vom Määntig znacht bis am Mittwuch

  demoorge! - Nit verbasse: d Schääsede am Mittwuch zwische 5 und

   6 Zobe  am Bluemerain!