Sujet 2018:

Hesch mer au e Bliemli? Wär kennt se nit

 Vo gross und glai die stiirmischi Bitt

 'Fir my Frindyyn' und 'fir my Mamme'!

 Oder eso äänlig deents denn amme.

 Ab hit – wehe du glaubsch das nit,

 Gheert zer Wältkultuur jetz au die Bitt.

 

 

 

 

 

Jetz hämmers ändlig schwarz uff wyss;

Fascht wiene Oscar e begäärte Bryys

Isch d Uffnaam uff d UNESCO-Lischte.

Samt em -minu syner Goschdym-Kischte.

Us aller Wält bringt uns das Gescht

Deert muesch drby syy, das ischs Greescht.

Zer Wältkultuur gheert die spitzi Zunge

(fascht jede Väärs gilt jetz als glunge).

Wird är gsunge ischs e kuuli Schau

Die maischte lache jo denn au.

Pfyffe und Drummle wird global verschtande

Und mit ere Gugge kasch au no lande.

Bletzlig sin Zeedel wiider haiss begäärt

Als „I BI DEERT GSI!“  hän si e neje Wäärt.

Wärs nit verschtoot, das macht jo nyt,

Das erläbsch au bi de aigene Lyt.

Tradizioone schitze haisst au pflääge:

Leent s Baseldytsch drum nit im Rääge!

Au d Chaise gheere in Cortège yyne.

Ooni die Scheene wärs zem Gryyne.

Miir alli pflääge d Fasnachts-Tradizioon

Bis zem allerletschte Schnuuf und Doon.

 

  

 D Ladäärne- uff em Minschterplatz und d  Waage- und  Reggwisyte-

  Uusstellig bi dr Kasäärne sin vom Määntig znacht bis am Mittwuch

  demoorge! - Nit verbasse: d Schääsede am Mittwuch zwische 5 und

  6 Zobe  am Bluemerain!