SYYDEBÄNDEL

 

WAS WÄÄR BASEL OONI….?!

 

Lueg emool ins16./17. Joorhundert zrugg: 

D Stadt proschperiert und floriert im Biecher-Drugg. 

Nei drzue kemme Fabrikante fir Syydebändel, 

Wo schyynts gflichtet sin vor kiirchlig-bolitischem Händel. 

Ryych sin si ko, no ryycher sin si worde. 

Aazooge hän si au no anderi Sorte; 

Wär Gäld het, mues es au lo verwalte.

D Wirtschaft foot sich langsam aa schpalte: 

Fabriziere, schpediere und händele 

Und mit de Bangge guet verbändele. 

Nobel und au adlig sin si gsi, die Neie.

Die Zuewandrig isch bis hit nit z bereie. 

Als Glaubensflichtigi sin die erschte ko; 

Hätte aigetlig wider miesse go. 

S lokali Gwärb isch ene verbotte gsi, 

Aber Syyde isch glyy als Glanzpunggt drby. 

Mit em 30jährige Grieg hets noonemool Neii gä: 

S Saaresyys, Thierrys und Birrs hän sichs nit lo nä,

Wie au d De Barys, Fuurgeds, Chrischts und Co., 

Zu uns uff Basel ans Rhygnei zko. 

Zämme mit Socins, Mivilles, et cetera

Het Basel bletzlig e Bidyttig kaa. 

Me het e hyrootsbolitischs Sippli kocht 

Und d Dechter an richtig Maa aane brocht. 

Dr Daig het sich schnäll erwyyteret. 

Gäld zue Gäld, so isch au nyt gschydderet. 

Dr Daig het daiggled; me blyybt unter sich. 

E Saaresyy nimmt e Buurged fir sich. 

E Chrischt duet sich mit ere  Merriaa zämme 

E Suter wott sich e Thierry länge. 

E Firschtebärger wäält e De Bary uus, 

E De Bary nimmt aini us em Firschtebärg-Huus. 

Dr nägscht De Bary hyrootet bis Keenigs yyne 

E Saaresyy griegt  e Scheenauer – e Fyyne. 

E Chrischt fangt sich e Thurnyysen yy. 

E Stäächeli anglet aini vom Chrischt näbeby. 

E Ryychner will au e Chrischt-Maitli ha. 

E Socin macht sich an e Saaresyy dra.

Denn mische au s Hoffmanns greftig mit. 

Ai Daigglerei, wo s au hit no git! 

D Syydeheere kenne in scheene Ville lääbe. 

Aber wär duet aigetlig die Bändel wääbe? 

Uff dr Landschaft hets gnue armi Lyt und glaini Buure, 

Wo dr aige Boode nit gnue bringt und d Määge knurre. 

‘Basemänte*’ isch ämmel Arbet und bringt Gäld! 

Wo allewyl an alle Egge und Aende fäält! 

Doch kaine will babiirigi Neetli ha. 

Am Fimflyyber isch ämmel no Silber dra. 

Drum haisst s Fimflyybertaal wie s haisst, 

Will Noot au alli zämme schwaisst. 

Doch schtell in dy Schtuube e Wäbschtuel vo 5 Meter 

Und loos dr ganz Daag däm sy Gezeeter! 

Scho d Goofe mien nach de Uffzgi Schpieli mache, 

Do blyybt nit vyyl Zyt zem Schpiile und Lache. 

Dr Hoffmann het denn s Wääbe revoluzzioniert. 

Är het d Bändelmiili brocht und induschtrialisiert.

Vyyli Basemänter sin au in d Stadt go schaffe, 

Um deert d Iberläbensbatze zämmezraffe. 

Dangg däne flissige Händ und de gwiifte Heere 

Duet sich syt Joorhundert dä Erfolg no vermeere. 

Uff aimool leest Zelluloose d Syyde ab, 

Mit em Nailon goots no mee durab.

Drno sin Bändel iberhaupt nimm in Moode; 

D Band-Induschtrie liggt doot am Boode. 

Aber drus uuse entschtande isch d Basler Chemie 

Und mängg andri Firme-Dynaschtyy. 

Drum widme ych em Syydeband e Orde 

(und ooni Basemänter wärs nyt worde).

 
   

 

Wär no kai Orde het und am Mittwuch um die Fimfi bim 

DreyKeenig zer Schääsede mit mym Zeedel duure kunnt, 

griegt aine  (s het so langs het).

 

 

D Ladäärne- uff em Minschterblatz und d  Waage- und 

Reggwisyte-Uusstellig bi dr Kasäärne sin vom Määntig 

znacht bis am Mittwuch demoorge!

 

 Inschpirazioon: Museum BL, Lieschtel (duurendi Uusschtellig zur

                                     Syydebandwääberei) und Stroux.org

 

*Basemänte=Bandwääbe, 

  Basemänter (Posamänter)=Bandwääber