I waiss, was i mache wött

 

I ha n e Ydee, jo i glaub, i due s mache.

Öbber muess doch über d Fasnacht wache!

I ha langi Zyt und die duet mi animiere;

I gang an dr Fasnacht in d Stadt go flaniere.

Am Mäntig oder am… naj an alle drey Dääg

Legi s Goschdüm aa und gang uff e Wääg.

Ganz ellai däbbele n i d Freye Schtross duurab.

I hoff, i mach derby nit allzue schnäll schlabb.

I ka jo niene aanesitze, sich alles zue.

Aber si isch magisch, die ungwoonti Rue.

Doch wenn i in mi yyne loos, ka n is hööre.

Jo, i wurd bigoscht au druff schwööre;

Do ruesst ain si Drummle, döört Piccolodöön!

My Härz goot uff, es isch wunderschöön.

Im Roothuus sitz i kurz uff d Schtääge,

Do höör i tatsächlig no e Gugge fääge.

Dr Määrtblatz isch leer, s isch mer glyych.

 

Im Härz hani Fasnacht, das macht mi ryych.