Dr Zeedel vom Myggi:

Mer baue ab!*

• Abbaue haisst: e reschtruggdurierts Fusions-Konzentraat flexiibel fokussiere

Nit numme d'Chemie und Bangge

Kemme mit de Schtruggduure ins Wangge.

Wotsch uf em Erfolgsglais no mitfaare,

Haisst d Devise abbaue* und spaare.

Im Ellaigang bhauptsch di hit nimm,

Aber abbaue* isch jo nit so schlimm!

Drum folge au miir dääre Wälle;

Mer gheere schlisslig zue de Schnälle!

Drum baue au miir jetz ab!*

Alles was mer nimme bruuche

Dien mer ufs Minimum zämmestuuche.

Do muesch nit lang studiere:

An de Gfiil kasch gwaltig reduziere.

Niene inveschtiersch eso schlächt,

Wie dy Härz bim andere Gschlächt.

S koschtet numme Zyt und Gäld,

Doch wärt isch s kain uf dääre Wält.

Loos, kemmet, mer baue ab!*

Fir was bruuche mer si denn, die Männer?

Zletscht blyybt doch maischtens nur e Schämmer.

Si hän kai Mumm me in de Gnoche.

Mit Gligg kenne si no Kaffi koche.

Satti Wäädli, Oberärm mit Myysli

Bringe kai Gyggeli us em Hyysli.

D'Mischtkibel trage mer sit langem sälber uuse

Und bim Schmuuse dien sie glyy säälig pfuuse.

Mer baue ab: und jetz erscht rächt!*

Blangsch und wirsch doch emool schwach,

Griegsch poschtwändend aini uffs Dach.

Aentwääder bisch nur eini unter vyyle

Oder si Ditti zem e bitzeli spiile.

Drum sage miir: lieber futt mit Schaade,

Bivor miir Fraue geen go baade.

Ruume miir uff däre Wält nit uff

Verschtigge mer in däm eewige Männer-Buff.

Dr ainzig Wääg: mer baue ab!*

Abbau* däät au em Bundesroot wirgglig guet

Deert näämte mindeschtens grad 6 dr Huet.

S gäb denn au kaini Zircher mee,

Und das däät sowiso niemetsem wee.

E ganze Staat kenntsch abbaue!

Oder gits im Vatikan eppe Fraue?

S'Arbetsamt miecht d'Schalter zue,

Denn fir d Fraue gäbs denn Arbet gnue.

Gseesch s yy? Miir baue ab!*

Dr Grossroot sparti e mängge Batze,

Verzichtsch au deert uff Schnäuz und Glatze.

Au d Eergsellschafte wääre gschtriche,

D'Eer isch jo längscht vonene gwiche.

D'Bilanz isch guet und miir sin zwääg.

Mer wisse, miir sin uff em rächte Wääg.

E himmlisch Paradiis uff Aerde

Kennt d'Wält ooni Männer fir is wärde.

E modäärne Drigg, dr Abbau-Tigg!*

Doch fascht hätte mer s ibersee:

S gäb jo denn au kai Comitee!

D'Frau Fasnacht aber blyybt wie allewyyl,

Und das isch letschtlig unser Zyyl.

Nur eppis no in perseenliger Sach,

Das macht au e Zwätschge schwach:

Ain goot bi däm Abbau nit unter!

Dr Dambuurmajoor; vo de Rumpel kunnt er.

Hauptsach isch doch: uns goot s guet!